აშშ-მა ირანის წინააღმდეგ სანქციები გააფართოვა
აშშ-მა ირანის წინააღმდეგ დაწესებული სანქციები გააფართოვა და შეზღუდვები რვა ფიზიკურ პირზე, მათ შორის ბანკირ ალი ანსარიზე, ასევე ექვს კომპანიაზე გაავრცელა, – ამის შესახებ აშშ-ის სახაზინო დეპარტამენტმა განაცხადა.
„აშშ-ის სახაზინო დეპარტამენტის უცხოური აქტივების კონტროლის ოფისმა (OFAC) ზომები მიიღო ირანელი ფინანსური შუამავლის, ალი ანსარის წინააღმდეგ, რომელიც ირანის ლიდერის, მოჯტაბა ხამენეის და რეჟიმის ელიტის სხვა წევრების სახელით ზედამხედველობს აქტივების უზარმაზარ გლობალურ ქსელს“, – ნათქვამია დეპარტამენტის განცხადებაში.
სააგენტოს მონაცემთა ბაზის თანახმად, სანქციების სიაში შეტანილი კომპანიები რეგისტრირებულია ირანში, ჰონგ-კონგში, არაბთა გაერთიანებულ საემიროებსა და სენტ-კიტსსა და ნევისში.
„დღეს, OFAC-მა ასევე მიიღო ზომები ირანის ძირითადი ვალუტის გადამცვლელების წინააღმდეგ, რომლებიც ყოველწლიურად მილიარდობით დოლარს რიცხავენ სანქცირებული ირანული ბანკების სახელით და იყენებენ ფიქტიური კომპანიების ქსელებს რეჟიმის უკანონო ფინანსური საქმიანობის დასაფარად“, – განაცხადა სახაზინო დეპარტამენტმა.
8-9 ივლისს აშშ-ის სამხედრო ძალებმა ირანის წინააღმდეგ ძლიერი დარტყმების სერია განახორციელეს. აშშ-ის ცენტრალურმა სარდლობამ განაცხადა, რომ ეს იყო შურისძიება ირანის ქმედებებისთვის ჰორმუზის სრუტეში ტრანზიტით მყოფი კომერციული გემების წინააღმდეგ. ირანის სამხედრო ძალებმა საპასუხოდ დარტყმები განახორციელეს ქუვეითში, ბაჰრეინსა და იორდანიაში მდებარე აშშ-ის ბაზებზე.
ეს იყო ირანსა და აშშ-ს შორის დაძაბულობის გამწვავების მეორე შემთხვევა მას შემდეგ, რაც ივნისის შუა რიცხვებში საბრძოლო მოქმედებების დასრულების შესახებ მემორანდუმი გაფორმდა. ამასთან, აშშ-ის პრეზიდენტმა დონალდ ტრამპმა ხუთშაბათს განაცხადა, რომ ცეცხლის შეწყვეტის შეთანხმება აღარ მოქმედებს.
კომენტარები
კომენტარი