მუნდიალზე თამაშის წინ პირადი ტრაგედია დაატყდა თავს – რა ვიცით ჯეიდენ ადამსზე, რომელიც გარდაცვლილი ნახეს?
ჯეიდენ ადამსი სამხრეთ აფრიკის ფეხბურთის ერთ-ერთ ყველაზე იმედისმომცემ ტალანტად ითვლებოდა. მისი ისტორია საკმაოდ შთამბეჭდავია, რადგან ძალიან მოკლე დროში შეძლო ადგილობრივი ჩემპიონატიდან მსოფლიო ჩემპიონატამდე მისვლა.
ის 2001 წლის 5 მაისს სამხრეთ აფრიკის ქალაქ კეიპტაუნში დაიბადა. ადგილობრივი პრესა წერს, რომ ადამსი ბავშვობიდანვე გამოირჩეოდა ტექნიკითა და მოედნის ხედვით. პროფესიონალური კარიერა დაიწყო Stellenbosch FC-ში, სადაც 19 წლის ასაკში გახდა ძირითადი შემადგენლობის წევრი. 2025 წელს გადავიდა Mamelodi Sundowns-ში, რომელიც აფრიკის ერთ-ერთი ყველაზე ძლიერი კლუბია. იქ მალევე მოიგო სამხრეთ აფრიკის ჩემპიონატი და დაეხმარა გუნდს აფრიკის ჩემპიონთა ლიგის მოგებაში. სამხრეთ აფრიკის ეროვნულ ნაკრებში დებიუტი 2022 წელს ჰქონდა. მსოფლიო ჩემპიონატის შესარჩევ ეტაპზე 13 მატჩი ჩაატარა და 2 გოლი გაიტანა. ეს ტურნირი მისთვის ოცნების ასრულება იყო. სამივე ჯგუფურ მატჩში ითამაშა. მექსიკასთან და ჩეხეთთან სასტარტო შემადგენლობაში იყო. სამხრეთ კორეასთან გამარჯვების მატჩში სათადარიგოდან შევიდა. სამხრეთ აფრიკა ისტორიაში პირველად გავიდა პლეი-ოფში (1/32-ფინალში), რაც ქვეყნისთვის ისტორიული მიღწევა იყო.
მსოფლიო ჩემპიონატის დროს მას პირადი ტრაგედია დაატყდა თავს. ჩეხეთთან მატჩამდე ერთი დღით ადრე გარდაეცვალა ბებია, რომელმაც მის აღზრდაშიც და კარიერაში დიდი როლი ითამაშა. ადამს ბებიასთან განსაკუთრებული ემოციური დამოკიდებულება ჰქონდა. მისი თქმით, თამაშის დროს მისი ფიქრები სულ ბებიასთან იყო. მიუხედავად ამ ტკივილისა, ჯეიდენ ადამსმა მაინც გადაწყვიტა ქვეყნისთვის ეთამაშა. მწვრთნელებმა აღნიშნეს, რომ ეს მის პროფესიონალიზმსა და ხასიათზე ბევრს ამბობდა. ადამსს ჰყავდა პარტნიორი, აქველა ადენდორფი, რომელმაც ფეხბურთელის გარდაცვალებას ემოციური პოსტიც მიუძღვნა.
მნიშვნელოვანია აღინიშნოს, რომ ოფიციალურად გარდაცვალების მიზეზი არ გამოქვეყნებულა. ინტერნეტში გავრცელდა სხვადასხვა ვერსია, მათ შორის თვითმკვლელობის შესახებ, მაგრამ ეს დადასტურებული არ არის და ხელისუფლებას მიზეზი საჯაროდ არ განუცხადებია. მისმა სიკვდილმა დიდი შოკი გამოიწვია, რადგან რამდენიმე დღით ადრე მსოფლიო ჩემპიონატზე საკუთარი ქვეყნის ერთ-ერთი გამორჩეული ფეხბურთელი იყო. თანაგუნდელები, კლუბი, სამხრეთ აფრიკის ფეხბურთის კავშირი და FIFA-ს წარმომადგენლები მას ნიჭიერ, თავმდაბალ და შრომისმოყვარე ადამიანად იხსენებდნენ.