უძველესი სენი და ეპიდემია: აშშ-ში ერთდროულად კეთრს და ნაწლავურ ინფექციას ებრძვიან – რა უნდა ვიცოდეთ და რამდენად სახიფათოა
ამერიკის შეერთებული შტატების ჯანდაცვის სექტორი ერთდროულად ორi სერიოზულ გამოწვევას წინაშე დადგა: ფლორიდის შტატში ათასწლოვანი ისტორიის მქონე კეთრი ბრუნდება, ხოლო 15-ზე მეტ შტატში ქვეყნის ისტორიაში ყველაზე მასშტაბური პარაზიტული ეპიდემია მძვინვარებს.
კეთრი ფლორიდაში: 4000-წლოვანი დაავადების მოულოდნელი აფეთქება
ფლორიდის შტატში ჰანსენის დაავადების, იგივე კეთრის შემთხვევების მატება დაფიქსირდა. ადგილობრივი ჯანდაცვის უწყებების ცნობით, ინფიცირებულთა რაოდენობამ 19-ს მიაღწია, ხოლო ეპიდემიოლოგიურ კერად ბრევარდის ოლქი იქცა.
დაავადებათა კონტროლისა და პრევენციის ცენტრის (CDC) განმარტებით, კეთრი იშვიათია ამერიკაში, თუმცა ბოლო პერიოდში შემთხვევები სისტემატურ ხასიათს იღებს.
რა უნდა ვიცოდეთ კეთრის შესახებ?
დაავადებას ხანგრძლივი ინკუბაციური პერიოდი აქვს – სიმპტომები შესაძლოა ინფიცირებიდან 20 წლის შემდეგაც კი გამოვლინდეს, რაც დიაგნოსტიკას მნიშვნელოვნად ართულებს.
საზოგადოებაში გავრცელებული მითის საპირისპიროდ, კეთრი მარტივად არ გადადის. ინფექციისთვის საჭიროა ინფიცირებულთან ხანგრძლივი და მჭიდრო კონტაქტი. გარდა ამისა, კაცობრიობის 95% ბუნებრივად რეზისტენტულია ამ ბაქტერიის მიმართ.
სამხრეთ შტატებში ბაქტერიის მატარებლები ხშირად ჯავშნოსნები (Armadillos) არიან, თუმცა ცხოველიდან ადამიანზე ინფექციის გადაცემის რისკი შედარებით დაბალია.
სიმპტომები და საფრთხეები
დაავადება უპირველეს ყოვლისა აზიანებს კანს, ნერვულ სისტემასა და თვალებს.
ძირითად სიმპტომებში შედის: კანზე გაუფერულებული, წითელი ან სქელი ლაქები მგრძნობელობის დაკარგვით; უმტკივნეულო წყლულები ტერფებზე და კანქვეშა კვანძები; კუნთების სისუსტე, თითებისა და კიდურების პარალიზი; წარბებისა და წამწამების ცვენა, მხედველობის გაუარესება.
თანამედროვე მედიცინაში კეთრი სრულად განკურნებადია ანტიბიოტიკების კურსით. თუმცა, მკურნალობის გარეშე დატოვებამ შესაძლოა გამოიწვიოს ნერვების შეუქცევადი დაზიანება, კიდურების დეფორმაცია და სიბრმავე.
ეპიდემია: 10,000-ზე მეტი ინფიცირებული 15 შტატში
პარალელურად, აშშ-ის ჯანდაცვის სექტორი ებრძვის პარაზიტ Cyclospora cayetanensis-ით გამოწვეულ მასშტაბურ ინფექციას (ციკლოსპორიაზი). ეს არის ამ დაავადების ყველაზე დიდი აფეთქება ქვეყნის ისტორიაში, რომელმაც 10,000-ზე მეტი ადამიანი დააზარალა.
საიდან გავრცელდა პარაზიტი?
ციკლოსპორიაზი ნაწლავური ინფექციაა, რომელიც ორგანიზმში დაბინძურებული საკვებისა თუ წყლის მეშვეობით ხვდება. CDC-ისა და FDA-ის ერთობლივი გამოძიებით დადგინდა, რომ ეპიდემიის სავარაუდო წყარო კომპანია Taylor Farms-ის მიერ ცენტრალური მექსიკიდან იმპორტირებული აისბერგის სალათის ფურცლები გახდა. პროდუქცია ბაზრიდან უკვე ამოიღეს.
სიმპტომები და მკურნალობა
პარაზიტი აზიანებს წვრილ ნაწლავს და იწვევს:
მწვავე, წყლისებრ და ხშირ დიარეას;
მუცლის ძლიერ სპაზმებს, შებერილობასა და გულისრევას;
ქრონიკულ დაღლილობას, მადის დაკარგვასა და წონის მკვეთრ კლებას.
ექიმების განმარტებით, დაავადება სიცოცხლისთვის პოტენციურად საშიში არ არის, თუმცა იწვევს ძლიერ დეჰიდრატაციას. პაციენტებს ურჩევენ ელექტროლიტებისა და სითხის ინტენსიურ მიღებას, ხოლო სიმპტომების გახანგრძლივების შემთხვევაში – სპეციალური ანტიბიოტიკოთერაპიის ჩატარებას.