კაცი თვითმფრინავის ავარიული კარის გაღებას 9 100 მეტრის სიმაღლეზე ცდილობდა – იგი აეროპორტში დაფრენისთანავე დააკავეს
ინდოეთში, ავიარეისზე 36 წლის მამაკაცი თვითმფრინავის ავარიული გასასვლელის კარის გაღებას შეეცადა, როდესაც თვითმფრინავი დაახლოებით 9 100 მეტრის სიმაღლეზე იმყოფებოდა. ამის შესახებ უცხოური მედია წერს.
შემთხვევა 7 აგვისტოს, კუალა-ლუმპურიდან ინდოეთის ქალაქ კოჩიში მიმავალ Batik Air-ის რეისზე მოხდა. მგზავრი, ჯამშირ ათანიკკალი, 12A ადგილას იჯდა.
პოლიციის ინფორმაციით, მამაკაცმა ავარიული გასასვლელის გაღება ყოველგვარი წინაპირობის გარეშე სცადა და პროცესში კარის ფანჯრის პანელიც დააზიანა.
როდესაც ეკიპაჟის წევრებმა და სხვა მგზავრებმა მისი შეჩერება სცადეს, მამაკაცი მათ დაემუქრა. საბოლოოდ, მგზავრებმა და ეკიპაჟის წევრებმა მისი დამორჩილება შეძლეს და სპეციალური პლასტმასის სამაგრებით ხელები შეუკრეს.
ინციდენტის ამსახველ ვიდეოებში ჩანს თვითმფრინავის სალონის დაზიანებული ნაწილი და მამაკაცი, რომელსაც ეკიპაჟის წევრები აკავებენ.
ყველაზე უცნაური კი მამაკაცის პასუხი აღმოჩნდა.
როდესაც სამართალდამცველებმა ჰკითხეს, რატომ სცადა თვითმფრინავის კარის გაღება, მან უპასუხა, რომ იმ მომენტში უბრალოდ „ამის გაკეთება მოუნდა“.
მამაკაცმა ასევე განაცხადა, რომ სახლში ახალშობილი შვილის სანახავად ბრუნდებოდა. თვითმფრინავი უსაფრთხოდ დაეშვა კოჩის აეროპორტში, სადაც ათანიკკალი დააკავეს.
გამომძიებლები გეგმავენ მამაკაცის ფსიქიკური მდგომარეობის შეფასებას, რათა დაადგინონ, რა მდგომარეობაში იმყოფებოდა ის ინციდენტის დროს.
შემთხვევის შედეგად ბორტზე მყოფი ადამიანებიდან არავინ დაშავებულა.
გამოძიება გრძელდება.