ეროვნული ბანკი: 13 პროვაიდერი კომპანია ფინანსური მონიტორინგის სამსახურის მიერ მოთხოვნილი ინფორმაციის დაგვიანებით წარდგენისთვის დაჯარიმდა
„ცამეტივე კომპანია მხოლოდ საქართველოს ფინანსური მონიტორინგის სამსახურის მიერ მოთხოვნილი ინფორმაციის წარუდგენლობა/დაგვიანებით წარდგენისთვის დაჯარიმდა“,- ამის შესახებ საქართველოს ეროვნული ბანკის მიერ „ბიზნესპარტნიორის“ კითხვის საპასუხოდ გამოგზავნილ განცხადებაშია განმარტებული.
„თქვენს მიერ დასმული კითხვის საპასუხოდ, რომელიც შეეხებოდა ეროვნულ ბანკის მიერ ვირტუალური აქტივების მომსახურების 13 პროვაიდერის მიერ ფულის გათეთრების აღმკვეთი კანონმდებლობის მოთხოვნების დარღვევისთვის დაკისრებულ ჯარიმებს, განვმარტავთ, რომ ცამეტივე კომპანია დაჯარიმდა მხოლოდ საქართველოს ფინანსური მონიტორინგის სამსახურის მიერ მოთხოვნილი ინფორმაციის წარუდგენლობა/დაგვიანებით წარდგენისთვის.
საქართველოს ეროვნული ბანკი, საკუთარი მანდატის ფარგლებში, რეგულარულად, რისკზე დაფუძნებული მიდგომის გათვალისწინებით ზედამხედველობს რეგულირებულ სუბიექტებს, მათ შორის, ვირტუალური აქტივების მომსახურების პროვაიდერებს.
გამოყენებული საზედამხედველო ზომების შესახებ ინფორმაცია სისტემატურად ქვეყნდება ჩვენს ვებგვერდზე“,-ნათქვამია სებ-ის მიერ გამოგზავნილ ინფორმაციაში.
შეგახსენებთ, საქართველოს ეროვნულმა ბანკმა ვირტუალური აქტივების მომსახურების 13 პროვაიდერი ფულის გათეთრებისა და ტერორიზმის დაფინანსების აღკვეთის შესახებ კანონმდებლობის მოთხოვნების დარღვევისთვის დააჯარიმა. სანქციები კომპანიებს სხვადასხვა რაოდენობის დარღვევის ფაქტის გამო დაეკისრათ.