Bloomberg: ევროპაში სიცხისგან გამოწვეული სიკვდილიანობის მაჩვენებელმა 25 000-ს გადააჭარბა
Bloomberg-ის მიერ შეგროვებული უახლესი მონაცემებით, წელს ექსტრემალურმა სიცხემ ევროპაში 25 000-ზე მეტი ადამიანი იმსხვერპლა.
რობერტ კოხის ინსტიტუტის მონაცემებით, გერმანიაში ყველაზე მაღალი მაჩვენებელი დაფიქსირდა, აპრილიდან მოყოლებული სიცხესთან დაკავშირებული სიკვდილიანობა დაახლოებით 11 900-ს შეადგენს. ესპანეთის, საფრანგეთის, დიდი ბრიტანეთის, შვეიცარიისა და ნიდერლანდების სამთავრობო უწყებებისა და კვლევითი ინსტიტუტების მონაცემებით, რეგიონში სიცხესთან დაკავშირებული სიკვდილიანობა 25 000-ს აჭარბებს.
მიმდინარე ზაფხულს დასავლეთ ევროპა სიცხის ოთხმა მძლავრმა ტალღამ მოიცვა, რამაც ტემპერატურული რეკორდები მოხსნა და ეკონომიკურ აქტივობას დარტყმა მიაყენა. სიცხე მომავალ კვირას კვლავ მოიმატებს, რა დროსაც ოთხშაბათისთვის ლონდონში 34°C, ხოლო პარიზში 38°C-მდე ტემპერატურაა პროგნოზირებული.
მაღალი დღე-ღამური ტემპერატურა და მაღალი ტენიანობა განსაკუთრებულ საფრთხეს უქმნის მოწყვლადი ჯგუფების ჯანმრთელობას. სიცხის ხანგრძლივმა ზემოქმედებამ შესაძლოა თავბრუსხვევა, გულისრევა და კუნთების სპაზმი გამოიწვიოს, რაც ხშირად სითბური დაკვრითა და ფატალური შედეგითაც კი სრულდება.
სიცხით გამოწვეული ჭარბი სიკვდილიანობის შეფასება ხდება გარკვეულ პერიოდში გარდაცვლილთა რაოდენობის შედარებით გასული წლების ისტორიულ საშუალო მაჩვენებლებთან. სამთავრობო სააგენტოებისა და კვლევითი ინსტიტუტების მიერ გამოქვეყნებული მონაცემები დაგვიანებით იწერება და ჯერ არ ასახავს სიცხის ბოლო ტალღას, რომელიც აგვისტოს დასაწყისში დაიწყო.
კომენტარები
კომენტარი