კანადაში უკონტროლო ტყის ხანძრები მძვინვარებს – კვამლმა აშშ-ის ცა დაფარა: ჰაერის დაბინძურების მაღალი დონის წინაშე 100 მილიონზე მეტი ადამიანი აღმოჩნდა
კანადაში ტყის ხანძრების შედეგად წარმოქმნილმა კვამლმა შეერთებული შტატების ჩრდილო-აღმოსავლეთი და შუა დასავლეთი მოიცვა, რის გამოც 100 მილიონზე მეტი ადამიანი ჰაერის დაბინძურების მაღალი დონის წინაშე აღმოჩნდა.
ყველაზე მეტად დაზარალებულ ქალაქებს შორის ნიუ-იორკი, ბოსტონი, ჩიკაგო და დეტროიტია, სადაც ჰაერის ხარისხი მნიშვნელოვნად გაუარესდა. ადგილობრივი ხელისუფლების თქმით, ჰაერში მავნე წვრილი ნაწილაკების (PM2.5) კონცენტრაცია საგრძნობლად გაიზარდა.
სპეციალისტების განმარტებით, PM2.5-ის ნაწილაკები იმდენად მცირე ზომისაა, რომ ფილტვებში ღრმად აღწევს და სისხლშიც კი ხვდება. მათ შეუძლიათ გამოიწვიონ სუნთქვის გაძნელება, ბრონქიტი, ფილტვების ანთება, ასევე გაამწვავონ გულის დაავადებები და სხვა ქრონიკული პრობლემები.
განსაკუთრებული რისკის ქვეშ არიან ბავშვები, ხანდაზმულები და გულისა ან სასუნთქი სისტემის დაავადებების მქონე ადამიანები.
ეროვნული მეტეოროლოგიური სამსახური მოსახლეობას ურჩევს, შეძლებისდაგვარად მოერიდონ ღია ცის ქვეშ ხანგრძლივ ყოფნას, შეამცირონ ფიზიკური აქტივობა და ფანჯრები დახურული შეინარჩუნონ.
კანადაში მიმდინარე წლის განმავლობაში უკვე თითქმის 3 500 ტყის ხანძარი დაფიქსირდა, რომლებმაც 4.8 მილიონ ჰექტარზე მეტი ტერიტორია გაანადგურა. ბოლო კვირებში განსაკუთრებით რთული ვითარებაა ონტარიოს პროვინციაში, საიდანაც კვამლი სამხრეთისკენ, აშშ-ის მიმართულებით ვრცელდება.
მეცნიერები აღნიშნავენ, რომ კლიმატის ცვლილება ტყის ხანძრების სეზონს უფრო ხანგრძლივსა და ინტენსიურს ხდის.