ქალებს მამაკაცებზე წვერი ასაკის მიხედვით განსხვავებულად მოსწონთ – კვლევა
თუ ფიქრობთ, რომ მამაკაცის წვერი ქალებისთვის უბრალოდ გემოვნების საკითხია, ეს კვლევა კიდევ ერთ საინტერესო დეტალს აჩვენებს – ქალის ასაკს შესაძლოა მნიშვნელობა ჰქონდეს იმაში, რამდენად მიმზიდველად აღიქვამს ის წვერიან მამაკაცს.
კვლევა, რომელიც ჟურნალ Adaptive Human Behavior and Physiology-ში გამოქვეყნდა, 19-დან 70 წლამდე ასაკის 122 პოლონელ ქალს მოიცავდა. მონაწილეებს მამაკაცის ფოტოები აჩვენეს, რომლებშიც მკვლევრებმა ციფრულად შეცვალეს სახის თმის რაოდენობა – სუფთად გაპარსული სახე, მსუბუქი წვერი და სრული წვერი.
შედეგი საინტერესო აღმოჩნდა: უფროსი ასაკის ქალები საშუალო და სრული წვერის მქონე მამაკაცებს უფრო მიმზიდველად აფასებდნენ, მაშინ როცა ახალგაზრდა მონაწილეებს საშუალო წვერის მიმართ ნაკლები სიმპათია ჰქონდათ. ამასთან, წვერის მიმართ განსხვავება ქალების ასაკთან იყო დაკავშირებული, მაგრამ თავად მენოპაუზის სტატუსმა მნიშვნელოვანი გავლენა არ აჩვენა.
მკვლევრების ერთ-ერთი შესაძლო ახსნაა, რომ წვერი მამაკაცს უფრო მომწიფებულ იერს აძლევს და შესაძლოა ასაკთან დაკავშირებულ მახასიათებლად აღიქმებოდეს. ამიტომ მისი მიმზიდველობა სხვადასხვა ასაკობრივ ჯგუფში განსხვავებული იყოს. თუმცა ავტორები ხაზს უსვამენ, რომ ეს მხოლოდ ერთ-ერთი შესაძლო ახსნაა.
კვლევამ სხვა საინტერესო განსხვავებებიც გამოავლინა. მაგალითად, უფროსი ქალები შედარებით მსუბუქად დაკუნთულ მამაკაცებს უფრო მიმზიდველად აფასებდნენ, ვიდრე ახალგაზრდა მონაწილეები. პოსტმენოპაუზის პერიოდში მყოფი ქალები კი V-ს ფორმის სხეულს ნაკლებად მიმზიდველად აფასებდნენ.
თუმცა კვლევის შედეგები ყველა ქალზე ან ყველა კულტურაზე ავტომატურად ვერ გავრცელდება. კვლევაში მხოლოდ 122 ქალი მონაწილეობდა და ყველა მათგანი პოლონეთიდან იყო; გარდა ამისა, მკვლევრებმა ფოტოების შესაქმნელად ერთი 22 წლის მამაკაცის სახე გამოიყენეს. ამიტომ შედეგები უფრო საინტერესო სამეცნიერო ტენდენციად უნდა განვიხილოთ და არა უნივერსალურ წესად.