ესპანეთში 17 ათასი წლის წინანდელი, ადამიანების ხელუხლებელი საცხოვრებელი აღმოაჩინეს – რა იპოვეს მეცნიერებმა გამოქვაბულში
ესპანეთის ჩრდილოეთით, ლა-გარმას გამოქვაბულში, მეცნიერებმა გამორჩეულად კარგად შემონახულ უძველეს საცხოვრებელს მიაგნეს. დაახლოებით 16 800 წლის წინ, კლდის ჩამოშლის გამო, გამოქვაბულის მთავარი დარბაზი ჩაიკეტა და ათასწლეულების განმავლობაში ხელუხლებელი დარჩა – ნივთები ზუსტად იმ ადგილას დევს, სადაც გამყინვარების ხანის ადამიანებმა დატოვეს.
რა იპოვეს არქეოლოგებმა?
შემოღობილი სახლი: დაახლოებით 5 კვადრატული მეტრის საცხოვრებელი სივრცე ქვებითა და სტალაგმიტებით იყო შემოფარგლული. სავარაუდოდ, ეს კონსტრუქცია ჯოხებსა და ცხოველთა ტყავებს ეჭირა, ცენტრში კი კერა იყო მოწყობილი.
4 600-ზე მეტი ნივთი: არქეოლოგებმა აღმოაჩინეს ქვისა და ძვლის იარაღები, შუბის წვერები, ნემსები და ჰარპუნის ერთ-ერთი ყველაზე ძველი პროტოტიპი.
უნიკალური ხელოვნება: იპოვეს ტურის ძვალი, რომელზეც გამოსახულია ცხოველი და ადამიანის სახე. ასეთი ექსპონატი პალეოლითის ხანის ევროპაში ჯერ არასდროს უპოვიათ.
სამკაულები და ნადირობა: აღმოჩენილია ირმის, ცხენისა და ბიზონის ძვლებისგან დამზადებული საკიდები.
ნადირობდნენ თუ არა პალეოლითის ადამიანები გამოქვაბულის ლომებზე?
გამოქვაბულში ასევე მიაგნეს გადაშენებული ევრაზიული ლომების ძვლებს, რომლებზეც ადამიანის მიერ დამუშავების ნაკაწრები ეტყობა. მეცნიერები ვარაუდობენ, რომ გამყინვარების ხანაში ტყავის მოპოვების მიზნით ინტენსიურმა ნადირობამ, შესაძლოა, ამ მტაცებლების სრულ გადაშენებასაც კი შეუწყო ხელი.
დღეს მკვლევრები ლა-გარმას შესწავლას უახლესი, უსაფრთხო მეთოდებით განაგრძობენ, რათა უნიკალური არტეფაქტები არ დაზიანდეს და უძველესი სამყაროს კიდევ ბევრი საიდუმლო გახსნან.