„მეტი ფული გვჭირდება“ – ზელენსკის განცხადებით, უკრაინას დამატებითი დაფინანსება სჭირდება დრონების ყოველდღიური წარმოების მკვეთრად გასაზრდელად და რუსეთთან კონკურენტუნარიანობის შესანარჩუნებლად
უკრაინას დამატებითი დაფინანსება სჭირდება დრონების ყოველდღიური წარმოების მკვეთრად გასაზრდელად და რუსეთთან კონკურენტუნარიანობის შესანარჩუნებლად, – განაცხადა პრეზიდენტმა ვოლოდიმირ ზელენსკიმ 24 აგვისტოს, კიევში გამართულ „მსურველთა კოალიციის“ სამიტის პრესკონფერენციაზე.
ევროკავშირისა და ნატოს წევრი ქვეყნების 30 ოფიციალური პირი და ლიდერი უკრაინის მხარდამჭერ შეხვედრაზე ქვეყნის დამოუკიდებლობის 35-ე წლისთავზე შეიკრიბა.
„ჩვენ, რა თქმა უნდა, საკმარისი სიმძლავრე გვაქვს წარმოების გასაზრდელად და თუ წარმოებას გავზრდით, მეტი შეტევის განხორციელებას შევძლებთ… თუმცა ამისთვის საკმარისი დაფინანსება არ გაგვაჩნია“, – განაცხადა პრეზიდენტმა.
ზელენსკის თქმით, რუსეთმა უკრაინის მიმართულებით გაშვებული „შაჰედის“ ტიპის დრონების რაოდენობა გაზარდა და ახლა მასშტაბური შეტევებისას დღეში 1 000-მდე უპილოტო საფრენ აპარატს იყენებს. იმისათვის, რომ „ეს ომი რუსეთს დავუბრუნოთ და ის მისთვის მტკივნეული გავახადოთ“, კიევს სჭირდება ყოველდღიური წარმოების იმ დონემდე გაზრდა, რომ მოსკოვს გაუტოლდეს.
„ჩვენ გვჭირდება ასეთივე კონკურენტუნარიანი რაოდენობა“, – აღნიშნა მან.
ზელენსკის მონაცემებით, უკრაინა ამჟამად დღეში დაახლოებით 200-300 დრონს აწარმოებს. კიევს ამ მაჩვენებლის გაასმაგება იმაზე ნაკლები თანხით შეუძლია, ვიდრე მოსკოვი თავის უპილოტო ავიაციის ინდუსტრიაზე ხარჯავს – 140 მილიონი ევრო რუსეთის 340 მილიონთან შედარებით – თუმცა ეს მაინც მოითხოვს უფრო დიდ ბიუჯეტს, ვიდრე უკრაინას ახლა აქვს.
„ჩვენ გვჭირდება მეტი ფული, ბევრად მეტი“, – განაცხადა ზელენსკიმ.