ავსტრალიაში Telegram-ს ექსტრემისტული კონტენტის გამო მრავალმილიონიანი ჯარიმა ემუქრება
ავსტრალიის ინტერნეტ უსაფრთხოების მარეგულირებელმა ორგანომ სამართლებრივი პროცესი დაიწყო აპლიკაცია Telegram-ის წინააღმდეგ, პლატფორმას ტერორისტული და ექსტრემისტული მასალის წაშლის მოთხოვნების შეუსრულებლობაში ადანაშაულებს.
ამის შესახებ ავსტრალიის ელექტრონული უსაფრთხოების კომისარმა, ჯული ინმან-გრანტმა განაცხადა.
სააგენტოს ხელმძღვანელის თქმით, ინტერნეტ უსაფრთხოების შესახებ კანონის სავარაუდო დარღვევისთვის Telegram-ს შესაძლოა 54.6 მილიონი დოლარის ოდენობის ჯარიმა დაეკისროს. მარეგულირებელი ორგანო აცხადებს, რომ პლატფორმამ, ადრე გაცემული გაფრთხილებების მიუხედავად, დროულად არ წაშალა ტერორისტულ საქმიანობასთან დაკავშირებული მასალები.
ჯული ინმან-გრანტმა განაცხადა, რომ ასეთი კონტენტი მომხმარებლებისთვის დიდი ხნის განმავლობაში ხელმისაწვდომი რჩებოდა და ხაზგასმით აღნიშნა, რომ არცერთი ციფრული პლატფორმა არ შეიძლება იყოს გათავისუფლებული მოქმედი კანონმდებლობის დაცვისგან. მან ასევე განაცხადა, რომ ასეთი მასალის საჯარო სივრცეში შენახვა საფრთხეს უქმნის საზოგადოებრივ უსაფრთხოებას.
სააგენტოს ცნობით, Telegram-ის მიერ ტერორისტული და ექსტრემისტული კონტენტის წინააღმდეგ ბრძოლის ზომების გამოძიება ჯერ კიდევ 2024 წლის მარტში დაიწყო. კომისრის თქმით, კომპანიას რამდენიმე თვის განმავლობაში არანაირი ურთიერთობა არ ჰქონია რეგულატორთან და შემდგომში, თანამშრომლობის დაწყების მიუხედავად, პლატფორმა კვლავ აგრძელებდა ექსტრემისტულ მასალებზე თავისუფალი წვდომის დაშვებას.
ავსტრალიის ხელისუფლების განცხადება მას შემდეგ გაკეთდა, რაც რუსეთის სამართალდამცავმა ორგანოებმა Telegram-ის დამფუძნებელი პაველ დუროვს ტერორიზმის ხელშეწყობაში ბრალი წაუყენეს. გამომძიებლები ამტკიცებენ, რომ შეტყობინებების აპლიკაციას უკრაინის სადაზვერვო სამსახურები რეკრუტირებისთვის იყენებდნენ.
ჯული ინმან-გრანტი ადრეც ხელმძღვანელობდა ავსტრალიის მთავრობის მიერ სოციალური მედიის გამოყენებაზე ასაკობრივი შეზღუდვების შემოღების მცდელობებს, რის შედეგადაც ავსტრალია გახდა პირველი ქვეყანა მსოფლიოში, რომელმაც მიიღო კანონი, რომელიც ასეთ პლატფორმებზე წვდომას 16 წლამდე ასაკის მომხმარებლებისთვის კრძალავს.
კომენტარები
კომენტარი