გაეროში უკრაინის ელჩი – უკრაინაში მშვიდობიანი მოსახლეობის წინააღმდეგ განხორციელებული ბარბაროსული თავდასხმების მიუხედავად, რუსეთი უკვე აგებს და საბოლოოდ წააგებს ამ ომს
გაეროში უკრაინის მუდმივი წარმომადგენლის, ანდრეი მელნიკის, განცხადებით, რუსეთი წააგებს უკრაინის წინააღმდეგ გაჩაღებულ ომს და მისი ეკონომიკა სულ უფრო და უფრო სუსტდება ხარჯების, სანქციებისა და უკრაინის თავდასხმების გამო.
„უკრაინაში მშვიდობიანი მოსახლეობის წინააღმდეგ განხორციელებული ყველა ბარბაროსული თავდასხმის მიუხედავად, რუსეთი უკვე აგებს და საბოლოოდ წააგებს ამ ომს“, – განაცხადა მელნიკმა გაეროს უშიშროების საბჭოს სხდომაზე, რომელიც უკრაინის დამოუკიდებლობის დღეს მიეძღვნა.
უკრაინელი დიპლომატის თქმით, რუსეთის ეკონომიკა უკრაინაში სრულმასშტაბიანი შეჭრის შემდეგ ყველაზე რთულ პერიოდს განიცდის და ის ზეწოლის ქვეშაა უზარმაზარი სამხედრო ხარჯების, დასავლეთის სანქციების და უკრაინის უნარის გამო, მიზანში ამოიღოს რუსეთის ნავთობისა და გაზის ინდუსტრიები.
მელნიკის მტკიცებით, რუსეთს არ შეუძლია გააგრძელოს გაჭიანურებული გამოფიტვის ომი, რადგან დანაკარგები სამხედრო გაწვევის მაჩვენებელს აღემატება, ფინანსური და მატერიალური ხარჯები კი იზრდება. ამასთან, „კრემლი აზვიადებს თავის ტაქტიკურ წარმატებებს, რათა შექმნას უწყვეტი სამხედრო გამარჯვების შთაბეჭდილება“.
უკრაინის ელჩმა ასევე სამარცხვინო უწოდა უშიშროების საბჭოს უუნარობას, წინააღმდეგობა გაუწიოს რუსეთის გენოციდურ ქმედებებს.
„სამარცხვინოა, რომ გაეროს უშიშროების საბჭომ აქამდე ვერ მიიღო ეფექტური ზომები რუსეთისთვის პასუხისმგებლობის დასაკისრებლად და უკრაინელი ხალხის ყოველდღიური გენოციდის თავიდან ასაცილებლად, რომელიც მთელი მსოფლიოს თვალწინ მიმდინარეობს,“ – აღნიშნა მელნიკმა.
მისი თქმით, რუსეთმა განზრახ დაიწყო ბალისტიკური ტერორის კამპანია უკრაინის წინააღმდეგ, ისარგებლა რა უკრაინულ ძალებში რაკეტების დეფიციტით.
„იმის ცოდნით, რომ უკრაინა საჰაერო თავდაცვისთვის რაკეტების კრიტიკულ დეფიციტს განიცდის, პუტინმა თანამედროვე კაცობრიობის ისტორიაში ყველაზე ცინიკური და სასტიკი ბალისტიკური ტერორის კამპანია წამოიწყო და განზრახ ესხმის თავს რიგით ადამიანებს მთელ უკრაინაში“, – აღნიშნა მელნიკმა.
მელნიკმა ამ სიტუაციას „აბსურდის ყველაზე საშინელი და ამაზრზენი თეატრი“ უწოდა, სადაც უკრაინა, დიდი ევროპული ძალა, „დღე და ღამ სასტიკად ნადგურდება მთელი საერთაშორისო საზოგადოების თვალწინ რუსული ბალისტიკური რაკეტებითა და დრონებით“.
„როგორც ჩანს, საერთაშორისო საზოგადოებას მხოლოდ გაეროს უშიშროების საბჭოს სხდომის მოწვევა და, საუკეთესო შემთხვევაში, რუსეთის მიერ მასობრივი მასშტაბით ჩადენილი ომისა და კაცობრიობის წინააღმდეგ ჩადენილი დანაშაულების დაგმობა შეუძლია“, – აღნიშნა მელნიკმა.
მან ხაზი გაუსვა, რომ მოსკოვის დანაშაულებრივი ქმედებების ყველაზე მკაცრი დაგმობაც კი „ვერ შეაჩერებს რუსული ბალისტიკური რაკეტების სასიკვდილო ძალას“ და პარტნიორებს გადამწყვეტი ქმედებებისკენ მოუწოდა. მელნიკის თქმით, საჭიროა რუსეთის წინააღმდეგ „ყველაზე მტკივნეული და ფართომასშტაბიანი სანქციების“ დაწესება, პირველ რიგში, სიკვდილის გამომწვევი იარაღის მწარმოებელი კომპანიების წინააღმდეგ, რათა პუტინი იძულებული გახდეს, ომი დაასრულოს.
უკრაინის ელჩმა ხაზი გაუსვა უკრაინისთვის Patriot-ის რაკეტებისა და სხვა თანამედროვე საჰაერო თავდაცვის სისტემების გადაუდებელ საჭიროებას და პარტნიორებს მოუწოდა, კიევს გადასცენ საჰაერო თავდაცვის ყველა სისტემა, რომელიც ამჟამად საწყობში ინახება.
„ჩემს თანამოქალაქეებს უჭირთ იმის გაგება, თუ რატომ ინახება საწყობებში რაკეტები, რომლებსაც ყოველდღიურად ასობით სიცოცხლის გადარჩენა შეუძლია, იმის ნაცვლად, რომ ისინი უკრაინის მშვიდობიანი მოსახლეობის დასაცავად გამოიყენონ“, – აღნიშნა უკრაინის მუდმივმა წარმომადგენელმა.