რუმინეთის ტერიტორიაზე დრონი აფეთქდა
რუმინეთის ტერიტორიაზე დრონი აფეთქდა, – ინფორმაციას რუმინეთის თავდაცვის სამინისტრო ავრცელებს.
რუმინეთის თავდაცვის სამინისტროს ცნობით, დრონი ქვეყნის საჰაერო სივრცეში რუსეთის მიერ უკრაინაზე ღამით განხორციელებული თავდასხმის დროს შეფრინდა.
„03:21 საათზე, დრონი რუმინეთის ეროვნულ საჰაერო სივრცეში, გალაცის აღმოსავლეთით, დაახლოებით 13 კილომეტრში შემოფრინდა“, – აცხადებს რუმინეთის თავდაცვის უწყება.
თავდაცვის სამინისტროს განცხადებით, დრონი ტულჩას ოლქში მდებარე დასახლებულ პუნქტ გრინდუდან დაახლოებით 4 კილომეტრში, დაუსახლებელ ზონაში ჩამოვარდა.
„დრონის ჩამოვარდნას ხანძარი მოჰყვა, რომელიც თავისით ჩაქრა. მსხვერპლის ან მატერიალური ზარალის შესახებ ინფორმაცია არ გავრცელებულა“, – ნათქვამია რუმინეთის თავდაცვის სამინისტროს განცხადებაში.