საქართველოს U16 ნაკრები ევრობასკეტის ფინალურ ეტაპზე – A დივიზიონში ასპარეზობას იწყებს
საქართველოს 16-წლამდელთა საკალათბურთო ნაკრები ევროპის ჩემპიონატის ფინალური ეტაპის წინაშეა — კონტინენტის ელიტარულ A დივიზიონში, რომელსაც რუმინეთის ქალაქი ორადეა უმასპინძლებს, ჩვენი ჭაბუკები ევროპის საუკეთესო 16 გუნდს შორის იასპარეზებენ. ეს ტურნირი განსაკუთრებული მნიშვნელობისაა, რადგან საქართველოს ასაკობრივ ნაკრებებს შორის სწორედ 16-წლამდელები არიან ერთადერთნი, ვინც უმაღლეს დივიზიონში სტაბილურად ინარჩუნებენ ადგილს და ევროპულ გრანდებს ტოლ-სწორად ეჭიდებიან.
ტურნირის მთავარი ამოცანა A დივიზიონში ადგილის შენარჩუნებაა, რისთვისაც 16 მონაწილეს შორის საუკეთესო 13 გუნდს შორის მოხვედრაა საჭირო, ხოლო გამარჯვებული ევროპის აბსოლუტური ჩემპიონის ტიტულს მოიპოვებს.
ჩვენმა გუნდმა ელიტაში ადგილი 3 წლის წინ, რუმინეთში გამართულ B დივიზიონში მოპოვებული ბრინჯაოს მედლით დაიმსახურა. მას შემდეგ ქართველმა ჭაბუკებმა უკვე ორჯერ მოახერხეს ელიტაში ადგილის დამკვიდრება — ჯერ საბერძნეთში გამართულ ჩემპიონატზე, ხოლო გასულ წელს თბილისში, საკუთარი გულშემატკივრის თვალწინ.
გათამაშების ფორმატი და ჯგუფური ეტაპი
ჩემპიონატის ფორმატი ტრადიციულია: ჯგუფური ეტაპიდან პლეიოფში აბსოლუტურად ყველა ნაკრები გადის, ხოლო სამი ტურის მატჩებს აქვს კლასიფიკაციის ფუნქცია — ჯგუფში დაკავებული პოზიცია განსაზღვრავს მერვედფინალის მეტოქეს. რაც უფრო მაღალ ადგილს დაიკავებს გუნდი, მერვედფინალში მით უფრო დაბალადგილოსან მოწინააღმდეგეს შეხვდება.
ჩვენი C ჯგუფი ჯვარედინად წყვილდება D ჯგუფთან (გერმანია, საფრანგეთი, სლოვენია, ბელგია). მაგალითად, C ჯგუფის მესამეადგილოსანი (C3) მერვედფინალში D ჯგუფის მეორეადგილოსანს (D2) დაუპირისპირდება, ხოლო ბოლო ადგილზე გასული (C4) — D ჯგუფის გამარჯვებულს (D1).
საქართველოს ნაკრების C ჯგუფის განრიგი ასე გამოყურება:
7 აგვისტო, 14:00 — ისრაელი vs საქართველო
8 აგვისტო, 21:30 — საქართველო vs ესპანეთი
9 აგვისტო, 16:30 — საბერძნეთი vs საქართველო
მზადყოფნა და სამწვრთნელო შტაბი
სანაკრებო შტაბს მთავარი მწვრთნელი ნიკა ბურჯანაძე უძღვება, რომელსაც ასისტენტობას ბექა ბექაია და გიორგი გოგალაძე უწევენ. ნაკრებმა საკმაოდ ნაყოფიერი მოსამზადებელი ეტაპი გაიარა: მზადება თბილისში დაიწყო, რასაც ლატვიასა და მონტენეგროში უცხოური შეკრებები მოჰყვა. ჯამში ჩატარებულმა 6 ამხანაგურმა მატჩმა გუნდს სათამაშო რიტმის დაჭერასა და ტაქტიკური დეტალების დახვეწაში ხელი შეუწყო.
საქართველოს 16-წლამდელთა ნაკრები ტურნირს სრული საბრძოლო მზადყოფნითა და მაქსიმალური კონცენტრაციით ხვდება, რათა ევროპის ელიტაში თავისი კუთვნილი ადგილი კიდევ ერთხელ ღირსეულად დაიცვას.
GBF.GE
წყარო: Sportall.ge