რონალდუ ფეხბურთიდან კინოინდუსტრიაში ინაცვლებს – ვარსკვლავი ახალ სერიალში მთავარ როლს შეასრულებს: “ეს ნამდვილი დრამაა კომედიური ელემენტებით“
კრიშტიანუ რონალდუ მსოფლიოს კიდევ ერთხელ აოცებს, თუმცა ამჯერად საუბარი არა მორიგ გოლზე, არამედ მის სრულიად ახალ ამპლუაზეა. ლეგენდარული ფეხბურთელი ბრიტანული ფეხბურთის შესახებ მომზადებული მასშტაბური დრამატული სერიალის აღმასრულებელი პროდიუსერი ხდება და მასში მთავარ როლსაც შეასრულებს.
-
ვარსკვლავური შემადგენლობა: ანრი, დემიან ლუისი და “აგენტების სამყარო”
სერიალი, სახელწოდებით Day 1s, გამოგონილი საფეხბურთო აგენტის, სტენლი დალტონის შესახებ მოგვითხრობს. ამ როლს სერიალების – Homeland-ისა და Billions-ის ვარსკვლავი, დემიან ლუისი შეასრულებს.
პროექტში რონალდუსთან ერთად მისი ძველი მეტოქე, ლეგენდარული ტიერი ანრიც გამოჩნდება. სერიალში ასევე მონაწილეობენ ბრიტანელი რეპერი Dave და ახალბედა მსახიობი კარლოტა ბანატი. აღსანიშნავია, რომ გადაღებები უკვე დაწყებულია ლონდონში, კერძოდ, საფეხბურთო კლუბ “ბარნეტის” სტადიონზე.
ინსაიდერების თქმით, პროექტის გარშემო უკვე დიდი დაინტერესებაა და მოსალოდნელია “ომი” სტრიმინგ-პლატფორმებს შორის საჩვენებელი უფლებების მოსაპოვებლად.
“ეს არ არის სიტკომი. ეს ნამდვილი დრამაა კომედიური ელემენტებით, რომლის უკანაც სერიოზული სახელები დგანან”, – აცხადებს წყარო.
სერიალი სტუდია UR•Marv-ის ბაზაზე იქმნება, რომელიც რონალდუმ ცნობილ რეჟისორთან, მეტიუ ვონთან ერთად დააფუძნა. ვონი, რომელიც Kingsman-ისა და Kick-Ass-ის ავტორია, მიზნად ისახავს კინოინდუსტრიაში “კონვენციური” მიდგომების შეცვლას.
-
რონალდუს ახალი თავი: “აღფრთოვანებული ვარ”
თავად 41 წლის რონალდუ, რომელიც ამჟამად საუდის არაბეთის “ალ-ნასრში” თამაშობს, ახალ პროექტს ენთუზიაზმით ხვდება: “ეს ჩემთვის ამაღელვებელი თავია, რადგან ახალ წამოწყებებს ოპტიმიზმით ვუყურებ”, – აცხადებს ვარსკვლავი.
რეჟისორი მეტიუ ვონი კი აღნიშნავს, რომ კრიშტიანუმ მოედანზე ისეთი ისტორიები შექმნა, რომელთა დაწერას თავად ვერასდროს შეძლებდა და მოუთმენლად ელის მასთან ერთად ინსპირაციული ფილმების შექმნას.