რობოტები უკვე ქირავდება, თუმცა რა შეუძლიათ მათ?
რობოტები, რომლებიც რამდენიმე წლის წინ მხოლოდ სამეცნიერო ფანტასტიკის ნაწილი იყო, დღეს უკვე საავადმყოფოებში, ქარხნებში, სასტუმროებსა და კერძო სახლებშიც ჩნდებიან. თუმცა, საინტერესოა, რომ სულ უფრო მეტი კომპანია და მომხმარებელი მათ ყიდვას აღარ ჩქარობს – ნაცვლად ამისა, რობოტებს ქირაობს.
-
აშშ-ის არაერთ საავადმყოფოში უკვე მუშაობს 120 სანტიმეტრის სიმაღლის თეთრი რობოტი Moxi, რომელიც მედპერსონალს სამედიცინო მარაგების გადატანაში ეხმარება. ის პაციენტებს არ მკურნალობს, თუმცა ექთნებს ყოველდღიურ საქმეებს უმსუბუქებს.
რობოტის შემქმნელი კომპანია Diligent Robotics მას გაყიდვის ნაცვლად სააბონენტო სისტემას სთავაზობს კლინიკებს. ეს მოდელი, რომელსაც „რობოტიკა, როგორც სერვისი“ (Robotics as a Service) ეწოდება, მოიცავს არა მხოლოდ თავად რობოტს, არამედ მის ტექნიკურ მომსახურებას, პროგრამული უზრუნველყოფის განახლებებსა და საჭიროების შემთხვევაში ინჟინრების დახმარებასაც.
კომპანიის წარმომადგენლების თქმით, ასეთი სისტემა მომხმარებლებისთვის უფრო ხელსაყრელია, რადგან მათ ერთბაშად დიდი თანხის გადახდა არ უწევთ. გარდა ამისა, რობოტების ტექნოლოგია ძალიან სწრაფად ვითარდება და პროგრამული უზრუნველყოფა მუდმივად ახლდება, ამიტომ გაქირავების შემთხვევაში მომხმარებელი ყოველთვის თანამედროვე ვერსიას იღებს.
დღეს რობოტების გაქირავება მხოლოდ საავადმყოფოებით აღარ შემოიფარგლება. მათი გამოყენება შესაძლებელია სხვადასხვა სფეროში: ღონისძიებებზე სტუმრების მისაღებად, ბარმენის ფუნქციის შესასრულებლად, ფერმებში სარეველების მოსაშორებლად და მრავალი სხვა დანიშნულებით.
კიდევ ერთი მნიშვნელოვანი უპირატესობა ტექნიკური მომსახურებაა. თუ რობოტს პრობლემა შეექმნება, მისი შეკეთება მომხმარებლის პასუხისმგებლობა აღარ არის, ამ ყველაფერზე მწარმოებელი კომპანია ზრუნავს.
რობოტების გაქირავება სწრაფად ვითარდება სამრეწველო სექტორშიც. ჩიკაგოში დაფუძნებულ კომპანიას Formic უკვე 250-ზე მეტი სამრეწველო რობოტი ჰყავს, რომლებიც საწარმოებში სწორედ ამ მოდელით მუშაობენ. კომპანიის თქმით, თუ მოწყობილობა დაზიანდება, მისი შეცვლა ან შეკეთება მთლიანად მათ პასუხისმგებლობაშია.
ჰუმანოიდური რობოტების განვითარებაში ერთ-ერთი ლიდერი ჩინეთია. ქვეყანაში რობოტები უკვე მუშაობენ სასტუმროებში, დასუფთავების სერვისებში და სხვა სფეროებში, ხოლო ზოგიერთი ჩინური კომპანია მათ გაქირავებას უკვე 17 ქვეყანაში, მათ შორის დიდ ბრიტანეთშიც სთავაზობს მომხმარებლებს.
თუმცა, ჩინეთში რობოტების პირდაპირი გაყიდვებიც კვლავ მაღალია. ექსპერტების შეფასებით, ამას დიდწილად სახელმწიფო სუბსიდიები და ტექნოლოგიური განვითარების მხარდაჭერა განაპირობებს.
იხილეთ ასევე:
- ჰუმანოიდი რობოტი “მთელი ცხოვრებისთვის“: ჩინეთმა წარადგინა ბოტები, რომლებიც ნამდვილ ადამიანებს ჰგვანან და ჩვენი მოძრაობების 90%-ს იმეორებენ
- ტაივანის საზღვრები შესაძლოა საპატრულო რობოტმა ძაღლებმა გააკონტროლონ – კუნძული შეიარაღებული ძალების მოდერნიზებას იწყებს: რა ფუნქციებით იქნება აღჭურვილი უახლესი ტექნოლოგია?