ნაკრების კანდიდატთა გუნდი ჩინეთში, სოლიდარობის თასზე საასპარეზოდ მიემგზავრება
ახალშექმნილი გუნდი, რომელიც უმეტესწილად საქართველოს ეროვნული ნაკრების კანდიდატებისგან არის დაკომპლექტებული, ჩინეთში მიემგზავრება. ეს გახლავთ მორიგი მცდელობა იმისა, რომ მოთამაშეები, რომლებსაც ნაკრების დონემდე მცირედი აკლდებათ, ეროვნული გუნდის შეკრებას სრულ მზადყოფნაში შეხვდნენ.
ეს არ გახლავთ საქართველოს „ბ“ ნაკრები, ამ გუნდის რეალური შინაარსი გაცილებით ფართო, ღრმა და სტრატეგიულია, ვიდრე უბრალოდ მეორე შემადგენლობა. ეს არის ეროვნული ნაკრების კანდიდატთა გუნდი – ცოცხალი, დინამიკური ორგანიზმი, რომლის დანიშნულებაც ქართული კალათბურთის მთავარი გუნდის უწყვეტი კვება და მოთამაშეთა პროფესიული განვითარებაა. ამ პროექტის მიღმა რამდენიმე უმნიშვნელოვანესი, მრავალმხრივი მისია დგას, რომლებიც ერთიანობაში ეროვნული გუნდისთვის კადრების მომზადებას უზრუნველჰყოფს.
ეროვნული ნაკრების კანდიდატთა გუნდის უპირველესი დანიშნულება მოთამაშეების იდეალურ სათამაშო ფორმაში ყოფნაა. საუბარია იმ კალათბურთელებზე, რომლებიც ეროვნული გუნდის გაფართოებულ შემადგენლობაში სტაბილურად ფიგურირებენ – ისინი მუდმივად გადიან ინტენსიურ საწვრთნელ პროცესს, ხან ხვდებიან ძირითად თორმეტეულში, ხან კი მის მიღმა რჩებიან. სწორედ აქ ირთვება კანდიდატთა ნაკრების უმთავრესი ფუნქცია: მისცეს მათ პრაქტიკა და მაღალი დონის სათამაშო რიტმი. ახლა, როდესაც სულ მალე ეროვნული ნაკრების მორიგი ოფიციალური შეკრება დაიწყება, ეს ბიჭები მთავარ გუნდს არა კონდიციების აღდგენის პროცესში, არამედ სრულ საბრძოლო მზადყოფნაში მყოფნი შეუერთდებიან. ეს არის შანსი – იყვნენ საუკეთესონი საკუთარ თავთან და მაქსიმალურად პროდუქტიულნი ქვეყნის პირველი გუნდისთვის.
სპორტული თვალსაზრისის გარდა, ამ გუნდს უდიდესი სოციალური და კარიერული მისია აქვს. საიდუმლო არ არის, რომ ამჟამინდელი კანდიდატთა ნაკრების რამდენიმე წევრი ამ ეტაპზე უგუნდოდაა. ჩინეთში დაგეგმილი საერთაშორისო მატჩები და მაღალი დონის ტურნირი მათთვის იდეალური ტრამპლინია. ეს არის შანსი, აჩვენონ საკუთარი შესაძლებლობები უცხოელი სკაუტებისა და კლუბების თვალწინ. ჩინური ტურნე ბევრი მათგანისთვის შეიძლება იქცეს ახალი, პერსპექტიული კარიერული გაჩერების საწყის წერტილად.
კანდიდატთა თუ დუბლ-შემადგენლობების იდეა მსოფლიოს წამყვან საკალათბურთო ქვეყნებში დიდი ხანია აპრობირებული და წარმატებული მოდელია. ეს პრაქტიკა უცხო არც საქართველოსთვისაა. თუ ისტორიას გადავხედავთ, 2016 და 2017 წლების ზაფხულში საქართველოს „ბ“ ნაკრები სწორედ ჩინეთში იმყოფებოდა ანალოგიური მისიით. დრომ აჩვენა, რომ ამ გადაწყვეტილებამ სრულად გაამართლა – სწორედ იმ ტურნეებიდან და ამ სტრატეგიული პლატფორმიდან აღმოცენდა არაერთი მოთამაშე, რომლებმაც შემდგომში ეროვნულ გუნდში მყარად დაიმკვიდრეს ადგილი და ჩვენს ნაკრებს დახმარება გაუწიეს.
კანდიდატთა ნაკრები, ორმელსაც ეროვნულ გუნდში ალეკსანდარ ჯიკიჩის ასისტენტი, მარკო ესპოზიტო გაწვრთნის, ჩინეთში სოლიდარობის თასზე იასპარეზებს. ეს არის საერთაშორისო ამხანაგური ტურნირი, რომელშიც მონაწილეობას მასპინძელ ჩინეთთან და საქართველოსთან ერთად მონტენეგროს და კამერუნის ნაკრებები იასპარეზებენ. ფორმატი ისეა შედგენილი, რომ საქართველო მონტენეგროს ორჯერ შეხვდება (24 და 27 ივლისს), ხოლო მასპინძელ ჩინეთს (25 ივლისს) ერთხელ.
ჩვენი ნაკრების შემადგენლობაში არიან:
ლუკა მაზიაშვილი, ლუკა ლიკლიკაძე, გიორგი კობახიძე, გეგა წულაია, ლევან გოგიჩაიშვილი, ვახტანგ გაფრინდაშვილი, ნიკოლოზ გაფრინდაშვილი, ვილი ისიანი, ცოტნე ცარციძე, რომა ჭინჭარაული, გიორგი ობგაიძე, ბექა ბექაური.
მთავარი მწვრთნელი: მარკო ესპოზიტოასისტენტი: ნიკა ცინცაძე
საქართველოს ნაკრები ჩინეთში 21 ივლისს გაემგზავრება და ქალაქ ჰაიკოუში (კუნძული ჰაინანის პროვინცია) 3 მატჩის გამართვის შემდეგ თბილისში 28 ივლისს დაბრუნდება.
GBF.GE
წყარო: Sportall.ge