“სახლი ნამსხვრევებად იქცა“ – რუსეთმა უკრაინაზე მასშტაბური იერიში მიიტანა: დაღუპულია 3 ბავშვი, რაკეტა პოლონეთშიც ჩამოვარდა
უკრაინაში რუსეთის მორიგ მასშტაბურ საჰაერო თავდასხმას მსხვერპლი მოჰყვა. ოფიციალური პირების ინფორმაციით, რაკეტებისა და დრონების იერიშის შედეგად 8 ადამიანი დაიღუპა, მათ შორის 3 ბავშვია. პრეზიდენტ ვოლოდიმირ ზელენსკის განცხადებით, ოკუპანტებმა ქვეყნის მიმართულებით ღამის განმავლობაში 70-ზე მეტი რაკეტა და 280-ზე მეტი დრონი გაუშვეს.
ყველაზე მძიმე დარტყმა კრივი-რიჰთან მდებარე სოფელ რადუშნეზე განხორციელდა. ბალისტიკური რაკეტა პირდაპირ იმ სახლს მოხვდა, სადაც მრავალშვილიანი ოჯახი ცხოვრობდა. პრეზიდენტის თქმით, ნაგებობა “ნამსხვრევებად იქცა“.
-
დაღუპულებს შორის არიან 6 წლის გოგონა და ორი ბიჭი – 11 და 17 წლის. მაშველებმა ნანგრევებიდან ორი ბავშვის ცოცხლად ამოყვანა შეძლეს, კიდევ რვა ადამიანი, მათ შორის 84 წლის ქალი, საავადმყოფოშია გადაყვანილი. სოფელში სულ ორი კერძო სახლი სრულად განადგურდა.
აფეთქებები კიევში, ლვოვსა და პოლტავაში
რუსულ იერიშს მსხვერპლი და ნგრევა მოჰყვა უკრაინის სხვა დიდ ქალაქებშიც:
- კიევი: დაიღუპა ერთი ადამიანი, ხანძარი გაჩნდა სამ არასაცხოვრებელ შენობაში.
- პოლტავა: დარტყმა განხორციელდა “ნოვა პოშტას“ საფოსტო ტერმინალზე, რასაც ერთი ადამიანის სიცოცხლე ემსხვერპლა.
- ლვოვი: დაზიანდა საცხოვრებელი კორპუსები, რამდენიმე ადამიანი ნანგრევებში მოჰყვა.
პარალელურად, საგანგაშო ინფორმაცია ვრცელდება პოლონეთიდან. პრემიერ-მინისტრი დონალდ ტუსკი ლუბლინის პროვინციაში, სოფელ ტარნავა-კოლონიასთან იმყოფება, სადაც მინდორში 10-მეტრიანი კრატერი გაჩნდა.
ტუსკის განცხადებით, ყველა ნიშანი მიუთითებს იმაზე, რომ ეს იყო რუსული Kh-101 ტიპის ბალისტიკური რაკეტა, რომელმაც ნატოს საჰაერო სივრცე დაარღვია. პოლონეთმა თავდასხმის დროს მორიგე გამანადგურებლები ჰაერში აწია.
-
დიპლომატიური ბრძოლა “პატრიოტებისთვის“
მასშტაბურ იერიშამდე რამდენიმე საათით ადრე, ზელენსკი ვაშინგტონში დონალდ ტრამპს შეხვდა. უკრაინის ლიდერი ცდილობს აშშ-სგან მიიღოს ლიცენზია Patriot-ის ტიპის რაკეტების ადგილზე წარმოებისთვის, რადგან ეს სისტემა ერთადერთია, რომელსაც რუსული ბალისტიკური რაკეტების შეჩერება შეუძლია.
საპასუხოდ, უკრაინულმა მხარემ იერიში მიიტანა რუსეთის ქალაქ პენზაში მდებარე რითეილერ Wildberries-ის საწყობზე, რის შედეგადაც ერთი ადამიანი დაშავდა.